Savognin - Ski-Club, Martegnas - Rennen 1935

Gio stagn nous avant la staschung da skis. Er igl onn 1935 era chegl uscheia. Ins preparava l'organisaziun dalla cursa annuala. Angal las cundiziuns eran otras. Pero igl siemi da davantar campiung dalla cursa martegnas era latent. Oz az preschainta igl placat cun las cundiziuns pratandeidas per la siertad digls partizipants. Daple infos sur dalla cursa suondan an intervals. Oz az lessa far attent da ligier las cundiziuns tg'ins pratandeva da chel taimp. Igl president digl club veva la nr. da telefon Nr. 601.Igl tragetg dalla cursa cumpigliva 8 km sen ena ladezza da 1200 m. Pista davigl nigna, ins niva angiu noua tg'ins geva anse. La fegnameira digl currider e la prateisa pigl victour era da rivar dalla partenza an igl pi curt taimp pussebel agl final. Per dar ena tscherta ruta per egn e mintgign madema e per far attent igls curriders sen privels, marcav ins la veia cun bandieras da diversas calours. Cotschen mussava la veia, mellen mussava eventuals prievels e pratandeva da franar an cass da basigns. Blo marcava las portas obligatoricas da maniera tgi mintgign veva ple u mang igl madem tratg. "Stockreiten" era scumando. Savez tgetgi "Stockreiten" era? Chegl numnav ins cura tg'ins tigniva la fista tranter las tgommas per uscheia saveir franar pi ferm. La fista era da chel taimp pitost lunga uschei tgi sa lascheva quasi seser sen ella tranter las tgommas. La cursa "Martegnas" era egna dallas impurtantas cursas agl Grischun, Igls Romingers da Segl/E. sa participavan regularmaintg. Pi tard lascha santeir scu tgi la cursa è reuscheida e scu tg'ins pigliva igl taimp……