Il scolast Martin Bundi aveva 3 classas ed en tut 44 scolaras e scolaras en sia stanza da scola.

Igl era ils 1930. En l'entira Svizra pauc lavur, uschia che tut tgi che saveva restava en la val e chattava lavur en l'agricultura e la selvicultura. Las famiglias eran grondas e mo paucas in zic bainstantas. Las ovras electricas eran anc betg construidas e las vias manglusas; autos devi mo paucs en il Grischun. Ed ins fascheva il pur sco quai ch'ins aveva fatg dapli tschientaners, senza maschinas e perquai cun greva lavur manuala.

Curaglia era mo ina da pliras scolas en la Val Medel. La scola primara cuzzava 26 emnas; las autras 26 emnas da l'onn sa gidavan ils uffants en famiglia, gievan famegl tar purs e fumitga en famiglias, faschevan chavrers e nursers e gievan ad alp. E fitg paucs avevan la schanza da far scolas pli autas u in emprendissadi.

In da quels scolars, il quart en la segunda retscha sisum sper il scolast, è Gion Battesta Bundi che stat oz a Cuira ed è stà scolast a la scola professiunala a Cuira. El ha dà a mai la foto per laschar publitgar ella ed el sa raquintar bler da Medel da lez temp.