Nus analisain da moda anonimisada las infurmaziuns da noss utilisaders per pudair porscher in meglier servetsch e satisfar a lur basegns. Questa pagina utilisescha er cookies per analisar per exempel las activitads sin la pagina.Vus pudais specifitgar en voss navigatur las cundiziuns d'archivaziun e d'access als cookies.
La pagina tetgala: historiaHelvetica
Runcahez

Runcahez

Archiv cultural Sumvitg

Runcahez, dretg mises dil Luis dil Geli

Runcahez. Num staus plausibels pil tschuppel mises che pulsavan inaga ella riva dretga dil Reinval denter ol Bogn Tenigia ed il Run, ni precisau en curschin denter vin Rusas Dadens e vi Runé. Actualmein munta el plitost il regress damaneivel dil Lag da Runcahez. Dils endisch baghetgs existents sco vegls e novs ein tschun tegias ni casas da vacanzas. Entgins ein en survetsch sco areal dil lag pella societad axpo. Il num ei deviaus leu ord il cult puril sco <runca dil Hez>; en RUNCAHEZ.

La schlatteina HEZ ei menziunada el RN 3 per stada viventa a Sumvitg gia el 17avel tschentaner. El menziunescha per anno 1639 ina Julia Hic e per anno 1691 in Lucius Hitz. Il prenum pil patrun genuin da Runcahez sefui denton da raquent e memoria gest sco gl'intent dalla schlatteina sezza.

L'erecziun dil lag, succedida ils onns 1950/60, ha midau bia a Runcahez. Siu plaun da pastira giufuns, mantunaus cul material explotaus ord las gallarias, senumna oz la Kippa. Dado quella ha il niev cuors da via principala midau la Punt Runé en Punt Rusas. Anenviars dadens la Vella Koller e la Geina dil Run, omisduas d'antruras, secattava il num Plaun Tschalès. Oz mo scutina quel dadensen dils baghetgs ella riva dretga dil lag.

Prest emblidai ein vi dadens la finiziun dalla Val Rentiert ils nums Resgia, Buola dalla Resgia cun gest dadens Punt dil Paul. Prest fugi dalla memoria ein denter auters mises perifers, quels dus svani el mir da fermada pil lag. Lur proprietaris fuvan Lucas Deplazes (1914-1990) da Surrein pil mises giufuns e Pieder Decurtins (1883-1963) da Cumpadials per quel sisum denter ils baghetgs digl implont. Tenor Benedetg Cathomas ei in dad els dus staus pli da baul mises da Toni Cagienard.

Aunc memoria a generaziuns pli veglias e quei senza cuolpa dil lag, resveglia vieifer ella spunda da Rentiert il num "Quei dil Caviezel" sco mises surcarschius.

tenor Paul Mathias Cathomas, NIES TRATSCH, pag. 440

Ti stos esser connectà per agiuntar in commentari
Nagin commentari il mument
30 october 2018
395 guardads
0 like
0 favurit
0 commentari
2 Collecziuns
Network:
Sponsurs:
16,186
810
© 2024 FONSART. Tut ils dretgs resalvads. Dissegnà da High on Pixels.