Nus analisain da moda anonimisada las infurmaziuns da noss utilisaders per pudair porscher in meglier servetsch e satisfar a lur basegns. Questa pagina utilisescha er cookies per analisar per exempel las activitads sin la pagina.Vus pudais specifitgar en voss navigatur las cundiziuns d'archivaziun e d'access als cookies.
La pagina tetgala: historiaHelvetica
Gion Rudolf Steinhauser (*1819)

Gion Rudolf Steinhauser (*1819)

1840
Uolf Candrian

Gion Rudolf Steinhauser-Coray (1819-18**) a Paris, fotografaus probabel els onns 1840. Siu tat fuva vegnius deportaus dils Austriacs a Puntina perquei ch'el simpatisava para culs franzos. Gion Rudolf Steinhauser (1762-1838) descriva sez sia depurtaziun:

«Anno 1799, ils 2. da jun', inna Dumengia antuorn las 10. Urras, che jeu erel gest eus en Baselgia, veng inna Parsuna a cloma mei ord Baselgia en Sagoing a gi: «avon vossa Casa ei in Um jester, il quai vul plidar cun vus; vus aber dueigias ira bein gleiti tier el.» Quei medem gi antuorn las 11. Urras sundel jeu eus ord Casa mia. (Cf. Il Sursilvan, 1884, nr. 26-28).»

Gion Rudolf Steinhauser-Caviezel, burgheis da Sagogn, ha giu treis fegls e duas feglias, dallas qualas la giuvna ei naschida in pèr gis avon la deportaziun dil bab:

Christ Giosch Steinhauser-Schmid (1786-1863) ha scret igl emprem cudisch d'instrucziun da quens per sursilvan, la «Fundamentala Instructiun en la Aridmetica» stampada 1808 a Cuera. Christ Giosch ei serendius en survetsch militar en Hollandia (1817-1829), el s'avanzaus al capitani ell'armada hollandesa e turnaus a Sagogn.

Gelli Steinhauser-Coray (1793-1879), il bab dil sura fotografau, ei staus activs ella politica da sia patria. Denter auter ha el suttascret il cuntract da cumpra dall'Alp Padanatsch enta Val egl onn 1832 en posiziun da mistral ensemen cun Gieri Bundi e Florian Cavelti. El ei staus mistral dalla Foppa 1821, repetidamein el cussegl grond e commember dalla dertgira cantunala. El ha luvrau a Paris ed ei turnaus cun enfiarlas per trer pumera a Sagogn, denter auter la cadeina che circumdescha il vitg aunc oz. El ha maridau Annamaria Wecker (?). In fegl han els numnau suenter il tat, Gion Rudolf Steinhauser (1819-18**) ei naschius ils 4 d'avrel 1819 a Sagogn. Era quel ha maridau a Paris ina Mariurschla Coray e lur suletta feglia Maria Cavelti-Steinhauser (1847-1919) ei naschida ella capitala franzosa.

Ina feglia ha plitard retschiert il surnum «La Poeta da Sagogn». Ella ha descret la separaziun dalla pleiv da Schluein egl onn 1850 en ina canzun oz sparida. Ses texts catt'ins mo, sch'ins sa tgi ch'ella ha maridau. L'ovra da Marinesa Candrian-Steinhauser (1799-1888) descriva numnadamein Reto Raduolf Bezzola en sia Litteratura:

«[Ella] avaiva giodieu bunas scoulas a Cuira [...] ed imprendet a far vers. Ella collecziunet eir e cumponit poesias populeras, specielmaing poesias da sudos, ch'ella avaiva prubabel udieu da sieu hom, il magiur Peder Candrian, e da sieus frer Rest Giosch Steinhauser, chapitauni in servezzan ollandais. Cf. Decurtins I-II, Annalas 3 (1888) e Ischi 26 (1937).»

Il tierz frar Gion Rudolf Steinhauser (1798-1870) ha 1867 construiu il clavau dalla casa dalla posta giun Streia entadem il quatier Casut che porta aunc oz sias inizialas originalas. El era probabel frar schumellin da Julia Candrian-Steinhauser (1798-1888).

Fontaunas:

  • Reto Raduolf Bezzola, Litteratura dals Rumauntschs e Ladins, 1979. p. 325.
  • Martin Bundi, "Sagogn dal 16avel al 20avel tschentaner" en: Annalas 87, 1974. Access persistent: http://dx.doi.org/10.5169/seals-231196
Ti stos esser connectà per agiuntar in commentari
Uolf Candrian
5 contribuziuns
29 october 2018
459 guardads
2 likes
0 favurit
4 commentaris
1 Collecziun
Gia 790 documentss associadas cun Avant 1900

Collecziuns:

Network:
Sponsurs:
16,186
810
© 2024 FONSART. Tut ils dretgs resalvads. Dissegnà da High on Pixels.