La foto muossa la caplutta da Sontgaclau a Tschamut. L'entrada a quella ei ornada cun tschupi pil primiziant Giacomeo Bernasconi.

Ils Bernasconis e Tschamut

Il contact cun Tschamut nescha, cura che Erminio Bernasconi s'engascha per la reconstrucziun della Viafier Furca-Alpsu. Sia finamira ei de segirar la lingia Mustér-Ursera era duront igl unviern. Ord quei motiv pren el dimora a Tschamut, fagend ina casa ord la cantina dils luvrers dalla lingia. Da Tschamut ano observa el il cuors dallas lavinas che smanatschan il tren e baghegia ord quellas experientschas las ustonzas e gallarias necessarias encunter la neiv. Igl unviern 1951 destruescha la lavina sia casa a Tschamut. Suenter baghegia Bernasconi ina casa a Sedrun, a Niregl, e passenta la sera de sia veta en Tujetsch. La vischnaunca da Tujetsch dat ad el per siu engaschi il dretg de burgheis d'honur.

Il ligiom cun Tschamut vegn rinforzaus cun in schabetg ell'atgna famiglia: Ils 11 d'uost 1932 serendan ils fegls digl inschignier E. Bernasconi, Giacomo Bernasconi, cun quater auters turists da Tschamut ano sil Pez Alv davos ella Val Maighels. Returnond crodan Giacomo e siu amtig Arturo Lafranchi sil Glatscher de Maighels en ina sfendaglia. Lur situaziun ella profunditad de 20 meters ei ualti desperada. Mo ei reussescha tras in bien gartetg de trer ora omisdus giuvens. Per engraziament alla providientscha divina edeschan ils spindrai ina broschura culla descripziun digl accident ed il recav della vendita vegn daus per la restauraziun della caplutta s. Clau e s. Bistgaun a Tschamut. La broschura secloma: «Las sfendaglias dil glatscher ei survetsch dil Segner».

Dretg la casa dils Bernasconis a Tschamut destruida entras la lavina digl onn 1951.