Nus analisain da moda anonimisada las infurmaziuns da noss utilisaders per pudair porscher in meglier servetsch e satisfar a lur basegns. Questa pagina utilisescha er cookies per analisar per exempel las activitads sin la pagina.Vus pudais specifitgar en voss navigatur las cundiziuns d'archivaziun e d'access als cookies.
La pagina tetgala: historiaHelvetica
Sontget da sontg'Antoni

Sontget da sontg'Antoni

Archiv cultural Tujetsch

Sontget da sontg'Antoni a Surrein/Tujetsch

Il sontget secatta el liug dalla caplutta veglia che ha stuiu vegnir dislocada in tschancun (1927) plinengiu denter las duas parts dil vitg da Surrein, numnadamein denter Surrein e Foppas.

La historia dil caplut ha Battesta Soliva-Cavegn nudau:

Il caplut da Sontg'Antoni a Foppas/Surrein

Ei era il mars digl onn 1945 che jeu Gion Battesta Soliva (1882-1957) e miu fegl Testi (1934-1997), havein fatg ina novena tier s. Antoni a Surrein per urbir a nossa cara mumma Onna Maria Giuseppa Cavegn (1896-1945) la sanadad ni levgiament da sia greva malsogna.

Cun quella caschun sefermavan nus savens sin il sulom dalla caplutta veglia. Cheu ei levau il patratg ch'ins duessi sin quei plaz tschentar ina enzenna per regurdientscha dalla caplutta veglia. La dunna e mumma ei morta igl uost 1945, il Battesta ha teniu plaid e baghegiau entgins onns pli tard il capluttet a Foppas.

Havend ofniau mia idea a miu bien amitg Maurus Berther (1880-1968), il qual ei immediat prompts da segidar, havein nus consultau il sur plevon Giachen Antoni Fetz (plevon a Sedrun da 1922-1948). «Jeu approbeschel Vossa stupenta idea e vi segidar cun Vus, tgei che jeu sai!», aschia ei sia declaronza. Pia ei la comissiun da baghegiar scaffida.

Dalla scantschala anora fa sur plevon la caussa publica e serecamonda tier ses parochians per agid finanzial.

In plan vegn elaboraus gratuitamein da frater Marcus Moser OSB, Mustér.

Il giuven Baseli Schmed (1918-1952) taglia crappa cun entgins da ses camerats e conluvrers han preparau la crappa en Plaun Perdé e mess ella giu Rein sper la punt, ina gronda lavur, gratis!

Sablun ed auter material ei vegnius menaus sil plaz entras ils proprietaris da cavals ed ils vischins da Surrein, gratis.

La construcziun da mir vegn surdada allla firma Willy, Cuera, che fageva da quei temps giu Las Rueras il drenasch. Siu construider era Florian Schwitter. Era a quella firma havein giu d'engraziar per bein enqual caussa ch'ei buca vegnida a quen. La statua da s. Antoni ch'era stada a mauns alla firma Xaver Stöckli, Stans, per schar dar ina terschinada, han ils treis signurs, plevon Giachen Antoni Fetz, Maurus Berther e Florian Schwitter astgau purtar sin ina tgetla da Sedrun a Surrein cun pagar 10.- frs. perin per la honur.

Sin il di da s. Antoni, ils 13 da zercladur 1947, cun caschun dalla processiun, ei stau benedicziun dil niev e bi sontget. La dracca diluviala en quei mument ha disturbau igl act tal'uisa, aschia ch'il provediu discuors ei daus ell'aua.

Cun quei di ei l'ovra stada finida e la clav ed il quitau surdau agl ugau dalla caplutta da s.Antoni, da quei temps era signur Aluis Curschellas-Berther (1894-1958) ugau. Anfl'ins per indicau da surdar la survigilonza en in auter liug, sche sa quei daventar.

Sontget da sontg'Antoni

Ti stos esser connectà per agiuntar in commentari
Nagin commentari il mument
Archiv cultural Tujetsch
1,212 contribuziuns
27 settember 2018
265 guardads
0 like
0 favurit
0 commentari
3 Collecziuns
Network:
Sponsurs:
16,179
810
© 2024 FONSART. Tut ils dretgs resalvads. Dissegnà da High on Pixels.