L'ultim chavrer da Vnà
L'ultim chavrer da Vnà
Franz Mangott, l''ultim chavrer da Vnà, circa l'on 1960
Franz Mangott, oriund da Spiss, Tirol, (cunfinand cun Samignun), d'eira üna persuna tuot speciala. Cun seis surrir e seis scharm veva'l bainbod acquistà la simpatia da tuot la populaziun da Vnà, dal plü giuven fin al plü vegl abitant. Il chavrer sten fidà possedeva üna chogna cun nom "prinzla". Perquai cha Franz nu saveva tschüblar per dar ils cumonds a la « prinzla » veva'l cumprà ün tschüblarot. La "prinzla" d'eira uschè bain educada, ch'ella d'eira capabla da radunar svess las chavras e tillas manar inavo pro'ls possessurs. Per clomar insembel las chavras la duman però feva'l adöver d'ün corn da bock, ch'el veva construi svess e chi spüzziva eir ladavo.
Las reglas dals paurs d'eiran da tour in dunzaina al paster, voul dir pro chavra üna tschaina ed implü la marenda pel prossem di. L'allogi da Franz d'eira üna stanza in chasa da scola veglia.
In seis temp liber jeva el cun seis bun ami Paperin Mischol jo'n Sinestra a ballar, sperond da chattar marusas e plü tard forsa eir partenarias, quai chi nu tils deira quella jada reuschi. Dürant il fratemp feva'l da nettajas-charpas pels giasts da la Pensiun Arina a Vnà. Quel service d'eira cumprais illa pauschala da pensiun plaina da fr. 18.-al di.
Plü tard - cur chi nu deva plü ingünas charvas - ha Franz bandunà l'Engiadina per tour domizil a Feuerthalen i'l chantun Turich. L'increschantüm e las bellas algordanzas da plü bod til trevan adüna darcheu inavo in seis cumün beà. Divers ons plü tard e'l lura tuornà be supergia per l'ultima jada in accumpagnamaint da sia partenaria ufficiala a far visita als da Vnà.
Foto e text mess a disposiziun da Erica Vonmoos.
historiaHelvetica - la pagina tetgala ... Nus avain dapli che mo ina istorgia, nus avain las istorgias da tut quels e quellas che fan e ch’han fatg la Svizra. historiaHelvetica.ch porscha ina survista da la vita quotidiana en Svizra sur passa in tschientaner. Il material d'archiv deriva da las quatter plattafurmas: nossaistorgia.ch, notreHistoire.ch, lanostraStoria.ch e unsereGeschichte.ch.