Giudem seposta la baselgia parochiala da s. Vigeli. Agl ur dil vitg dat ella d'entellir ch'ella seigi baselgia dalla val cun giusut il santeri da vischnaunca. Il Run taglia empermiez e fuorma da vart seniastra la fracziun ni vischinadi da Gonda. Encunter nord sesarva la Val Strem cul pass dil Ritzli (Krüzli) vi el cantun Uri. Quei pass ha valiu sco traversala dallas alps avon il 12avel tschentaner. Oz fa quei il tunnel dalla NEAT sut Tujetsch ora. Seniester egl ault ei l'alp Caschlè ed il pez git ei il Krüzlistock. Dretg dil tut empau veseivels ei il Witenalpstock. Biars pezs sil cunfin uranès han manteniu il num tudestg.

A Sedrun crodan treis casas en egl. Gest sur la baselgia il Museum La Truaisch, ina casa baghegiada 1899. Amiez il vitg la Tgès'Alva. La historia da quella ei nunenconuschenta. Ei vegn detg ch'ella seigi vegnida baghegiada da Monn's ch'erien stai en survetsch militar en autras tiaras. La construcziun schai carteivel el 17avel tschentaner. La casa gronda empau sin pinc ei il hotel Alpsu, baghegiaus 1906. Giudem Gonda croda la scola Sontget en egl. Quella ha aviert las portas per la scolaziun igl onn 1887.