Richard Petschen ed Ambros Furger ein "fumegls" duront la stad tier Carli Flepp. Ils 24 d'uost 1956, Richard haveva quei di 11 onns, han ils dus buobs astgau ir per bulius. Els van dil Run si ed engartan enzanua ils luvrers d'uaul, mo lez vesan buca els. Ils luvrers ein vidlunder da pinar in pégn. Quei cudezza da mirar tier. Richard di aunc si per Ambros: Dai adatg! tegn en il tgau! Mo lu succeda la gronda disgrazia. Il pegn sturnescha il buob. Tuts ch'ein consterni. Ils umens camondan ad Ambros [10 onns] dad ir ad informar tat Carli e lez duei clamar igl augsegner ed il miedi. Il tat ei buca gest d'entuorn e tgei fa il buob desparau: El camina tier la mumma Margreta Petschen [che fuva en speronza] e di tut aviartamein ch'il Richard seigi sedisgraziaus mortalmein. Tgei caussas! Mo la Margreta ha adina puspei detg: Enzatgi stueva tuttina dir quei a mi ed a nus. - Enzaconts meins pli tard obtegnan ils geniturs in buob en tgina: in Richard.