Igl ei stau sco in schabetg. En casa paterna d'Alexander Caviezel-Koch, ch'era emigraus igl onn 1900 a Catania, Sicilia, ha miu frar Andreas Caviezel spindrau ils cudisch da notas da nies basat, Lucas Caviezel, 1849 - 1932, ed da siu fegl Gion Caviezel,1887 - 1953.

Ed quei il di che la casa ei vegnida rumida diltutafatg, aschia ch'ils cudischs ein buca vegni dismess ella deponia Plaun Grond a Rueun! En quels cudischs ha mintga musicant stuiu purtar en sez las notas e tetels dils tocs sin las lingias. Forsa giu dalla tabla en scola ni da fegls ch'il dirigent cumprava.

Componists ein buca numnai! Quel da Lucas cuntegn 83 tocs, quel da siu fegl Gion mo ca. 40. Sin 50 fegls ein las lingias vitas. Entschiet a sunar ha Lucas duront il temps da scola. Denton ca. 40 tocs, all'entschatta dil cudisch, ha in auter cun ina fetg biala scartira scret las notas ed ils nums dils tocs.Tut ina autra scartira che Lucas.

Ils Caviezels ha darar in che ha giu ina biala scartira! In mussament dapli ch'ei deva a Pitasch ditg avon che Lucas, naschius 1849, musicants! Tut ils tocs ein numnai. Sco emprem: die lustigen Ehrlander, Schlitten Mazurka ed aschia vinavon. Sin in fegl segna Leonhard Nold da Pitasch ils 14 da matg 1902, scolast sekundar a Glion, cun siu num. Igl ei da supponer ch'el segidava da quei temps cun scriver notas per ils musicants, era el scolast ed staus dirigent dil Chor Ligia dil Glogn ed era dirigent dil Chor Viril Ligia Grischa.

In um cun ina udida per cant e musica tut speciala. Il bellezia e grondius tuchiez digl onn 1932 dalla baselgia reformada s. Margreta da Glion ei vegneus intonaus suenter ina proposta da Leonhard Nold da Pitasch.