Login

Inseri in num d'utilisader

Inseri in pled-clav

Jau hai emblidà mes pled-clav


Jau vi daventar commember da nossaistorgia.ch

Jau sun in'instituziun

 

 

Reglas per la publicaziun sin la plattafurma

 

Sin la plattafurma nossaistorgia.ch pon ins publitgar e cundivider ils agens archivs digitalisads, rediger artitgels e commentar. RTR As envida da participar ad in project editorial dal tuttafatg nov. Faschai or da Voss archivs persunals ina funtauna istorica d’interess general cun unir e cumplettar Voss cuntegns cun documents dad instituziuns, bibliotecas, mediatecas, museums e cun l’archiv digitalisà da RTR.

Tge ston ins savair per publitgar sin nossaistorgia.ch?

Per publitgar documents sin nossaistorgia.ch ston quels esser digitalisads. Alura stuais Vus As registrar. Ils documents digitalisads pudais Vus simplamain chargiar si cun smatgar «agiuntar in document». Questa funcziun chatt’ins sisum a dretga da mintga pagina da la plattafurma.

Ina giada ch’il document è chargià si, stuais Vus cumplettar il document cun infurmaziuns supplementaras che servan a la chapientscha. In titel, ina data, il num da l’autur dal document, ina descripziun dal tema e dal lieu. Questas infurmaziuns permettan da valurisar correctamain il document e simplifitgeschan la tschertga. Sin ina plattafurma, sin la quala il cuntegn crescha ad in crescher cun l’activitad da ses utilisaders, è la funcziun da tschertgar in element essenzial.

Nus As recumandain da prender temp per editar e cumplettar ils documents. Sch’i fa da basegn, pudais Vus far in sboz avant che publitgar definitivamain il document. Quai è pussaivel durant il process d’ediziun.

Igl è era pussaivel da crear documents multimedials, per exempel texts cumplettads cun illustraziuns che derivan da Vossa collecziun persunala u dal cuntegn da la plattafurma u dad autras funtaunas.

Nus dain gronda paisa a la qualitad da la plattafurma nossaistorgia.ch. Il cuntegn duai esser adattà al scopo da noss project editorial da raquintar l’istorgia da noss chantun. Perquai èsi impurtant da resguardar la suandanta regla:

Vus pudais chargiar si unicamain cuntegns, dals quals Vus essas l’autur u dals quals Vus possedais ils dretgs.

Ils documents publitgads sin nossaistorgia.ch èn suttamess al dretg d’autur. Vus pudais chargiar unicamain cuntegns, sche Vus essas l’autur u possedais ils dretgs (in'excepziun èn documents che fan gia part dal bain communabel u ch’èn libers da dretgs).

Il dretg d’autur protegia l’autur d’ina fotografia, d’in film, d’ina cumposiziun musicala, independent tge valur artistica che questa producziun ha. Quest dretg vala enfin 70 onns suenter la mort da l’autur.

Per publitgar cuntegns sin la plattafurma èsi indispensabel da resguardar ils dretgs d’autur, ils dretgs dad autras persunas pertutgadas (numnadamain ils dretgs d’interprets, da producents da discs e da videos) e medemamain er ils dretgs da la persuna (per exempel il dretg da l’agen purtret).

Dretgs e diever

Cuntegns vardaivels e corrects

Controllai ch'ils fatgs, ils eveniments, las datas, las opiniuns ed ils texts citads en Voss documents èn vardaivels e corrects. Quai è essenzial per la credibladad da Voss cuntegns.

Publitgai cuntegns a moda ponderada, reflectada ed adina cun la finamira da restar objectiv. Ils documents publitgads duain cuntanscher uschè bleras persunas sco pussaivel. Ils utilisaders duain pudair sa fidar dals cuntegns. Pli fitg ch’ins po sa fidar dals cuntegns e pli fitg ch’els vegnan stimads.

Citats èn lubids sin la plattafurma nossaistorgia.ch a cundiziun che Vus inditgais l’autur e la funtauna. Citats pon ins duvrar per cumplettar l’atgna opiniun. Els na duain betg esser pli lungs che diesch lingias dal text original. La reproducziun d’ina ovra scritta, entira ubain parziala, n’è betg lubida sin la plattafurma.

Avair respect

La communicaziun tranter ils utilisaders da la plattafurma duai esser curtaschaivla e cun respect vicendaivel. Igl è evident ch’i vegn a dar opiniuns cuntrarias entaifer ils commentaris ed il forum. Autras opiniuns duain vegnir tractadas cun respect.

Cundivider cuntegns sin nossaistorgia.ch

La plattafurma istorica, participativa e digitala nossaistorgia.ch è concepida per publitgar a moda simpla cuntegns, e per utilisar ils cuntegns dals auters cun crear dossiers. Cun rimnar e sutdivider cuntegns en dossiers èsi pussaivel da construir pass per pass l’istorgia sociala e culturala da la Svizra Rumantscha e dal Grischun. Ils cuntegns pudais Vus sutdivider persunalmain ubain laschar far quai dad auters. Uschia daventan ils documents persunals dals utilisaders funtaunas istoricas interessantas per il public.

Mintgin po far ses agens dossiers tematics u cumplettar ils dossiers dals auters cun agens documents. A dretga da mintga document datti la funcziun «agiuntar ad in dossier» per integrar cuntegns en in u plirs dossiers tematics. Ultra da quai stattan a disposiziun las collecziuns da documents dad instituziuns, tranter auter era parts dal archiv digitalisà da Radiotelevisiun Svizra Rumantscha (RTR). Quai èn funtaunas preziusas per enritgir ils agens cuntegns.

Recumandaziuns

Ortografia

Ils texts duain esser scrits en rumantsch grischun ubain en in dals idioms rumantschs – pon dentant era esser en tudestg e talian. Igl è impurtant da resguardar l’ortografia, la grammatica e las reglas tipograficas elementaras per pudair garantir la qualitad generala da las publicaziuns sin nossaistorgia.ch. Sin la plattafurma po ins rediger ils texts en scrittira grassa, cursiva u integrar colliaziuns ipertextualas.

Per cuntegns en furma da text (artitgels, testimonianzas) na datti naginas limitaziuns. I vala dentant da tegnair quint dal fatg ch’ins publitgescha cuntegns per auters. Perquai duai il cuntegn esser adequat concernent la lunghezza da las frasas, dals paragrafs, la qualitad da las illustraziuns ed il purtret entir da la publicaziun. Il num da l’autur è la referenza da ses cuntegn.

Nagin logo

I n’è betg lubì da publitgar sin nossaistorgia.ch logos, bandieras u auters elements da paginas d’internet externas.

Las funcziuns che stattan a disposiziun èn da duvrar unicamain per il scopo da la plattafurma. Nagin spam, nagina reclama e nagina furma da mulesta na vegn tolerà ni en commentaris ni en in'autra furma da nossaistorgia.ch. La plattafurma vegn survegliada per evitar maldiever.

Colliaziuns d’internet externas

Ils cuntegns da nossaistorgia.ch pon vegnir publitgads sin paginas d’internet externas cun agid da colliaziuns. Sch’ins fa ina colliaziun, per exempel per mussar in video da la plattafurma nossaistorgia.ch sin in’autra pagina d’internet, duain ins far ina colliaziun che maina directamain sin il cuntegn correspundent da la pagina da nossaistorgia.ch.

Moderaziun da la plattafurma

Il scopo da la plattafurma è da rimnar ils archivs digitals dals utilisaders. Las publicaziuns vegnan survegliadas. Tut ils cuntegns che na correspundan betg al scopo da nossaistorgia.ch vegnan bloccads senza preavis.

Il dretgs da bloccar cuntegns betg adattads èn resalvads. Bloccads vegnan cuntegns che surpassan las cundiziuns generalas u las reglas d’utilisaziun. Tut tenor la dimensiun d’in surpassament po vegnir stizzà il conto d’utilisader pertutgà e l’entir cuntegn da quel.

Reglas da moderaziun

La moderaziun da la plattafurma duai garantir la funcziun ed il scopo da nossaistorgia.ch e che las cundiziuns generalas e las reglas d’utilisaziun vegnian ademplidas. Questa funcziun surpiglia il moderatur da nossaistorgia.ch.

La moderaziun na vegn betg a controllar sch’ils cuntegns publitgads èn corrects. Sco gia declerà survart èn la vardaivladad e la correctadad en la cumpetenza da l’autur. Tuttina na tolerescha la plattafurma nagins cuntegns da propaganda, missiunars, da reclama ubain da promoziun, era betg entaifer testimonianzas persunalas.

Era sch’i para dad esser bleras limitaziuns: ellas servan unicamain a la qualitad generala dals cuntegns sin nossaistorgia.ch.

Grazia fitg che Vus avais prendì il temp per leger questas reglas per la publicaziun. Nus As giavischain bun divertiment e bleras scuvertas interessantas sin questa plattafurma.

Per ulteriuras dumondas u remartgas essan nus cuntanschibels sin nossaistorgia@rtr.ch