Login

Inseri in num d'utilisader

Inseri in pled-clav

Jau hai emblidà mes pled-clav


Jau vi daventar commember da nossaistorgia.ch

Jau sun in'instituziun

 

Dretgs e diever dals documents per ils utilisaders da la plattafurma nossaistorgia.ch

 

L'intent da questa plattafurma d’istorgia participativa è da porscher la pussaivladad da publitgar documents dad audio, da video, da maletgs ubain da texts e d'als unir en dossiers ubain en sutdossiers . I na dat nagina reclama sin la plattafurma; activitads commerzialas n’èn betg lubidas: l’intenziun è sulettamain d'edir cuntegns deditgads a l’istorgia da la Svizra rumantscha e dal Grischun; persunas privatas, instituziuns, museums, editurs, interpresas, scolas ed auters che vulessan sa participar a quest project per edir infurmaziuns, han la pussaivladad da publitgar e rimnar ils agens documents e da crear dossiers cun documents ch’èn disponibels sin la plattafurma. Impurtant è dentant che la dumonda dals dretgs saja reglada.

Avant che publitgar cuntegns sin la plattafurma

Tgi che publitgescha cuntegns, sto esser l’autur ubain avair ils dretgs da quels cuntegns. In’excepziun èn documents publics ch’èn en Voss possess. I sa tracta da documents publics, sche l’autur è mort dapi varga 70 onns.

Vossa collecziun duai consister unicamain da documents originals. nossaistorgia.ch è ina plattafurma che augmenta la valur da documents originals, surtut da quels betg edids; quai è l’intenziun specifica da noss project: rimnar e dar dapli valur a las collecziuns d’archivs da privats e dad instituziuns per scriver ed illustrar ensemen l’istorgia digitala da la Svizra rumantscha e dal Grischun.

Er auters dretgs èn pertutgads. Per exempel quels da musicists, dad interprets, da producents da discs e videos, ils dretgs da la persunalitad, spezialmain il dretg a l’agen purtret. Per quel scopo duain las persunas preschentadas sin ina fotografia dar lur consentiment avant che lur fotografia vegnia publitgada. Nus essan conscients ch’i vegn ad esser difficil da sa tegnair cumplainamain vi da questas directivas tar ina plattafurma deditgada als archivs. Perquai avain nus decis da volver enturn la procedura: la publicaziun vala sco acceptada, sche la persuna represchentada na fa betg valair ses dretg a l’agen purtret.

Entaifer nossaistorgia.ch

Sche Vus publitgais Voss documents sin nossaistorgia.ch, acceptais Vus che quels vegnan utilisads sin la plattafurma dals auters utilisaders senza Voss consentiment precedent. Questa libertad da diever è vegnida concedida entaifer il rom da noss project editorial ed è ina part da las cundiziuns d’utilisaziun da la plattafurma. Quai vul dir ch’in utilisader po selecziunar in u plirs documents d’in auter utilisader per als rimnar en in dossier ch’el edescha. Questa utilisaziun libra da documents tras ils auters utilisaders cumpiglia duas cundiziuns indispensablas: primo, il num da l'autur ubain dal possessur dals dretgs vegn cità automaticamain. Secundo, il document vegn utilisà senza al modifitgar en ina moda u l’autra.

Uschia restais Vus adina il possessur dals dretgs da Voss documents, dentant han ils auters il dretg d’utilisar ils documents sin nossaistorgia.ch.

Ordaifer nossaistorgia.ch

Ordaifer la plattafurma èn ils documents, dals quals Vus essas l’autur ubain avais ils dretgs, protegids dal copyright. Quai vul dir che terzs ston dumandar Vossa permissiun per utilisar Voss documents. Igl è dentant era pussaivel da dar liber ils dretgs da Voss documents, entiramain u parzialmain. Pussaivel daventa quai cun suttametter ils documents a la licenza «Creative Commons» che nus avain elegì (opziunal durant la procedura da publicaziun, adina cun la pussaivladad da modifitgar).

Creative Commons è in'organisaziun senza intent commerzial che vul facilitar la derasaziun e la distribuziun da cuntegns confurm al diever modern dals meds digitals. I sa tracta d’ina furma da dretgs d’autur adattada a las pretensiuns da l'internet. Publitgar cuntegns protegids d’ina licenza da «Creative Commons» facilitescha l’utilisaziun tenor las reglas admessas e renconuschidas ozendi. .

La licenza «Creative Commons» che nus avain elegì ha num Creative Commons CC-BY-NC-ND, e sa basa sin trais cundiziuns da diever tras terzs:

  • attribuziun dal num da l’autur u da la persuna che posseda ils dretgs: ins vegn cità sco autur ubain sco persuna che posseda ils dretgs;
  • nagina utilisaziun commerziala: senza il consentiment precedent da l’autur n’èsi betg pussaivel d’utilisar in document per profitar commerzialmain u per survegnir cumpensaziuns finanzialas;
  • naginas modificaziuns: autorisà è sulettamain da reproducir e distribuir il document original. Tut las modificaziuns ston avair la permissiun precedenta da l’autur u da la persuna che posseda ils dretgs.

La squadra editoriala da nossaistorgia.ch sco era l’editura da la plattafurma, la FONSART, recumondan da proteger Voss documents cun la licenza da Creative commons CC-BY-NC-ND : distribuir ed utilisar ils documents grazia al fatg che tuts pon sa participar a la plattafurma nossaistorgia.ch gida a sustegnair, promover e render enconuschent il project er ordaifer la plattafurma. Nus pensain per exempel a las persunas d’instrucziun che pon utilisar documents da nossaistorgia.ch senza stuair dumandar la permissiun da l’autur. Eleger «Creative Commons» fa part da las novas praticas da barat e d’accessibladad da documents e collecziuns digitalas. Questas praticas sustegnain nus e nus ans engaschain per quellas. .

Per ulteriuras infurmaziuns stain nus gugent a disposiziun: scrivai a nus in mail sin nossaistorgia@rtr.ch.