Login

Inseri in num d'utilisader

Inseri in pled-clav

Jau hai emblidà mes pled-clav


Jau vi daventar commember da nossaistorgia.ch

Jau sun in'instituziun

 

Dumondas frequentas (FAQ)

 

(Questa glista n’è betg cumpletta: collavurai cun nus per la tegnair actuala ed ans tramettai Vossas dumondas. Nus As respundain gugent. Scrivai a nossaistorgia@rtr.ch)

Jau visit savens la plattafurma: pertge duess jau m’inscriver?

L’inscripziun è indispensabla, sche Vus vulais deponer cuntegns, crear in dossier, agiuntar in commentari, inditgar Ma plascha, exprimer Vossa opiniun en il forum ed insumma per participar a quest project davart l’istorgia da la Svizra rumantscha e dal Grischun sin la plattafurma nossaistorgia.ch!

Tge dovri per esser utilisader da nossaistorgia.ch?

La veglia da participar ad in project davart l’istorgia da la Svizra rumantscha e dal Grischun ed in zic temp per publitgar agens archivs e/u crear e publitgar dossiers tenor Voss interess. L’inscripziun è gratuita e po vegnir annullada da tut temp. Ils utilisaders pon esser persunas singulas, gruppas (per exempel ina famiglia), associaziuns u instituziuns. Participar activamain al project pon ins be cun esser s’inscrits (avair in conto tar nossaistorgia.ch).

Tge cuntegns pon ins deponer sin la plattafurma?

Tuttas funtaunas istoricas che stattan en relaziun cun l'istorgia da la Svizra rumantscha e dal Grischun: cartas postalas, catasters, fotos, videos, registraziuns audio, artitgels, testimonianzas, commentaris, etc.

Tgeninas èn las cundiziuns per publitgar in cuntegn?

  • ils cuntegns ston esser en format digital
  • Vus stuais esser l’autur u posseder ils dretgs (guardai la pagina davart ils dretgs)
  • igl è necessari d’agiuntar las infurmaziuns relativas (cura, nua, tgi) per esser il pli coerent pussaivel, surtut per optimar la consultaziun e la tschertga
  • Vus stuais esser pront da cundivider ils cuntegns sin la plattafurma

È la plattafurma gratuita u la ston ins pajar?

Utilisar la plattafurma è gratuit. Ils custs da las activitads sin la plattafurma (mantegniment, svilups tecnics, monitoring editorial, moderaziun, etc. ) van a quint da Radiotelevisiun Svizra Rumantscha (RTR).

Tge valur han ils archivs da famiglia?

Vus pensais che Vossas fotos interessian en emprima lingia mo Voss parents? Mintgatant èn ellas dentant era d’interess per auters. La valur dals archivs da famiglia è ina dubla: per las emoziuns ch’ellas evocheschan, ma era sco funtaunas per il public che laschan reviver regurdanzas sumegliantas, ils medems lieus, eveniments famigliars ...! Voss archivs èn damai ina funtauna impurtanta per illustrar l’istorgia sociala e culturala da la Svizra rumantscha e dal Grischun. Igl è damai giustifitgà d’als preschentar sin ina plattafurma, nua che l’istorgia da tuts vegn scritta cun l’istorgia da mintgin.

Tge rolla giogan las instituziuns sin la plattafurma?

RTR vul dar dapli valur a la lavur da las instituziuns participadas a la protecziun da las funtaunas istoricas en Svizra rumantscha e dal Grischun. Mediatecas, bibliotecas, archivs chantunals, museums ... davent dad oz elavura mintgin da Vus sia atgna pagina per preschentar las atgnas funtaunas. nossaistorgia.ch metta a disposiziun ina plattafurma communabla, sin la quala era las instituziuns pon crear in agen conto cun ina selecziun dals megliers documents en lur possess.

Tgenina è la differenza tranter in abunà ed in abunament??

Per persequitar las activitads d'insatgi tanschi da s’abunar a ses profil. Questa acziun producescha in abunament. Il utilisader correspundent sa damai ch’el ha in abunà dapli, vul dir in utilisader dapli che persequitescha sia activitad.

Sin social media vegn discurrì da «communitad». Datti ina communitad nossaistorgia.ch?

Gea, la communitad sa cumpona da tut ils utilisaders da la plattafurma: instituziuns, privats, etc. Els s’obligheschan da suandar ina lingia editoriala e da respectar las cundiziuns generalas tenor las reglas da publicaziun.

Jau na chapesch betg la differenza tranter mes conto e mes profil!

  • Il conto è in instrument che permetta a mintga utilisader d’administrar sia atgna collecziun e las atgnas datas da preschentaziun, damai quellas datas che figureschan sut ses profil (foto/purtret, adressa dad e-mail, domicil, interess, etc.).
  • Il profil è la carta d’identitad dal utilisader, persuna singula u instituziun, vesaivla per tut ils auters utilisaders ed ils visitaders da la plattafurma. Là stattan las infurmaziuns che la persuna privata u l’instituziun ha elegì da far vesaivlas.

Index dals terms principals utilisads sin nossaistorgia.ch  

  • Abunaments: ils utilisaders che Vus persequitais sin la plattafurma..
  • Abunads: las persunas che partan Voss interess, persequiteschan la publicaziun da Voss dossiers ed als enritgeschan cun lur documents. Vegnan era numnads follower.
  • Artitgel: è in text che Vus scrivais. I po sa tractar d’in text infurmativ, descriptiv u persunal. Ina notizia biografica, intginas datas istoricas u Vossa testimonianza, quai èn tut elements che permettan da chapir meglier il context da Voss documents e da Voss temas.
  • Audio: inditgescha ina datoteca da tun.
  • Secturs: Quai èn quatter secturs che furman ils «puncts cardinals» da la plattafurma. «Eveniments» correspunda a muments impurtants da l’istorgia da la Svizra rumantscha e dal Grischun. Vus stuais alura classifitgar Voss agens dossiers en ina da las tematicas dal sectur che Vus avais tschernì. «Persunalitads» cuntegna ina glista da persunalitads impurtantas u che Vus vulais metter en evidenza. «Lieus» sa referescha a tut ils vitgs, las citads e regiuns dal Grischun. «Vita quotidiana» reunescha ils muments principals da la vita e las activitads generalas da nossa societad.
  • Tema: Mintga sectur ha anc auters temas. Per exempel tar il sectur «Lieus» en ils temas las regiuns dal chantun Grischun. In tema rimna documents da differentas funtaunas ed als inserescha en in dals quatter secturs da la plattafurma (vita quotidiana, lieus, eveniments, persunalitads).
  • Documents: nus discurrin da documents per las funtaunas istoricas, sco fotografias, films, registraziuns audio, artitgels publitgads sin la plattafurma, ma era manuscrits, documents publitgads, etc.
  • Dossier: suenter il document é il dossier il pli impurtant element da la plattafurma. Il dossier rimna tut ils documents, ord differentas funtaunas. In dossier fa adina part dad in dals temas sco era dals secturs (eveniments, persunalitads, lieus, vita quotidiana).
  • Collecziun supplementara: a l’intern da l’agen profil serva la collecziun supplementara per classifitgar ils documents che furman l’atgna collecziun.
  • Sutdossier : pon ins cumparegliar cun ils chapitels d’in cudesch. Cun in sutdossier pon ils documents en in dossier anc vegni structurads pli en detagl. I basta da crear in sutdossier entaifer il dossier, al qual el è collià.

Co poss jau persequitar l’activitad d’in utilisader? 

I basta da s'abunar a quest utilisader. Questa acziun producescha in abunament. .

«Creative Commons» Tge è quai?

Las licenzas Creative Commons èn ina nova moda da tractar la dumonda dals dretgs d’autur. Sis licenzas renconuschidas sin plaun internaziunal permettan da depassar ils limits dal copyright, senza al annullar. Questas licenzas favuriseschan la cundivisiun e l’utilisaziun da creaziuns, sclerind a medem temp las autorisaziuns accordadas da l’autur. Tranter questas sis licenzas avain nus tschernì ina che garantescha la meglra utilisaziun controllada dals documents preschentads sin la plattafurma a l’extern da nossaistorgia.ch. La licenza inditgescha a tgi ch'il document è attribuì e precisescha ch’i n'è ni lubì da duvrar il document a moda commerziala ni d’al modifitgar.

Poss jau metter ina foto actuala sin questa plattafurma deditgada als archivs?

Sa chapescha, sch’ella documentescha in eveniment social, cultural u politic da la Svizra rumantscha e dal Grischun. Las fotos dad oz èn ils archivs da damaun!

Poss jau retardar la publicaziun d’in document che jau n’hai anc betg en la versiun definitiva?  

Gea, igl è pussaivel da memorisar ils agens documents sco sbozs per avair il temp da documentar ina foto u, per exempel, da tschertgar la data u il lieu precis, etc. Pir cura ch’il document è tenor Vus pront, pudais Vus al publitgar, vul dir al faschais Vus public e damai vesaivel sin la plattafurma.

Jau tschertg infurmaziuns e cuntegns davart ina persuna. Co far? Poss jau far appel a perditgas?

Suenter avair tschertgà senza success en ils documents da la plattafurma, pudais Vus crear in dossier vid. Igl è ussa l’incumbensa dals auters utilisaders da respunder a Vossas dumondas cun documents, auters dossiers correspundents, artitgels, cussegls, etc. In’autra soluziun è da lantschar in appel en il forum.

Poss jau m’abunar a las actualitads da la plattafurma?

I n’è betg necessari da s'abunar; las davosas actualitads effectuadas sin la plattafurma èn disponiblas en il menu, sut Activitads, sisum a sanestra en il menu da navigaziun.

Vegnan ils tags (chavazzins) controllads sin nossaistorgia.ch?

En in tschert senn gea, cunquai che Vus essas envidà/-ada d’utilisar primarmain ils tags che As vegnan proponids.

Poss jau utilisar ils cuntegns d’auters utilisaders? Pon quels far il medem?

Gea, Voss cuntegns pon vegnir commentads, modifitgads (precisar lieus, datas, etc.). Els pon survegnir in Ma plascha, vegnir cundividids, agiuntads a dossiers e sutdossiers, ad artitgels, etc.

Stoss jau suandar reglas per publitgar in dossier?

In dossier è propi interessant, sch’el offra als auters la pussaivladad da cundivider ils documents u d’als consultar, d’agiuntar infurmaziuns ed illustraziuns, da far dumondas, e mintgatant era da svegliar in spiert critic. Per dapli infurmaziuns legiai las reglas per la publicaziun.

Dossier cooperativ, dossier betg cooperativ: tge è la differenza?

  • In dossier è cooperativ, sch’in utilisader al po modifitgar, enritgir cun auters documents, auters puncts da vista, etc.
  • In dossier n’è betg cooperativ, sche Vus pudais eleger tge documents che cumparan en Voss dossier e nagin auter utilisader po agiunscher documents. Attenziun: Vus pudessas uschia excluder l’access a cuntegns interessants, als quals Vus n’avessas mai pensà

Mes dossier (betg cooperativ) ma dat memia bler da far: a tgi al poss jau confidar?

En quest cas surdai il dossier a la communitad ed al transfurmai en in dossier cooperativ. Igl è plinavant pussaivel da transferir da tut temp la responsabladad ad in auter utilisader da nossaistorgia.ch che conuscha il dossier ed è pront da surpigliar l’incumbensa.
En il mender cas pon ins s'adressar a la persuna responsabla da la plattafurma (nossaistorgia@rtr.ch).

Tge far avant che crear in nov dossier?

Avant che crear in nov tema verifitgai, sche la tematica n’è betg gia vegnida tractada d’in auter utilisader. Utilisai per quest intent l’instrument da tschertgar. Sch’igl exista gia in dossier identic, èsi inditgà d’agiuntar ils agens cuntegns a quel. Sch’il dossier che Vus vulais crear, na persequitescha dentant betg las medemas finamiras, pudais Vus crear in nov dossier cun documents sumegliants.

Poss jau utilisar funtaunas externas e citats per rediger in artitgel?

Ils artitgels che Vus scrivais furman in’ovra inedida, da la quala Vus essas l’autur. Guardai da signar Voss artitgels.
Citats èn admess en ils artitgels da nossaistorgia.ch a cundiziun ch’ins numnia l’autur e la funtauna. Il citat duai esser in supplement a quai che Vus scrivais e na duai betg surpassar diesch lingias dal text d’origin. La reproducziun d’ina ovra scritta – entira u parziala – n’è betg lubida sin nossaistorgia.ch.

Pertge èsi da verifitgar l’ortografia e da tgirar la publicaziun?

La correctadad dals nums da las persunas e dals lieus, da las datas, dals eveniments, da las finamiras e dals texts citads e la fadia che Vus dais cun la redacziun èn tut elements che augmentan la credibladad da la lavur publitgada ed en general la qualitad da la plattafurma.
Noss instrument da tschertgar è fitg effizient, tuttina na po el betg chattar in lieu u in num ch’è scrit fauss!

Tgi gida a finanziar nossaistorgia.ch? Poss jau far ina donaziun?

Radiotelevisiun Svizra Rumantscha (RTR) e la Fondation pour la sauvegarde du patrimoine audiovisuel da la Radio Télévision Suisse (FONSART) finanzieschan il project. Per donaziuns contactai per plaschair nossaistorgia@rtr.ch.

Jau hai deponì tut mes archivs sin la plattafurma. Segirescha nossaistorgia.ch lur conservaziun ed archivaziun a lunga vista?

Da princip vegn spetgà da l’autur/da la persuna cun ils dretgs d’autur ch'ella s'occupia da la conservaziun e da l’archivaziun (a lunga vista) dals agens cuntegns. nossaistorgia.ch è numnadamain ina plattafurma da cundivisiun e da valitaziun dals documents e betg in lieu per archivar documents digitals.

Per raschuns praticas memorisescha la plattafurma datotecas derivantas da collecziuns privatas e da famiglia. Las datotecas da collecziuns instituziunalas, d’interpresas, d’associaziuns, etc. èn percunter archivads a la funtauna da las persunas cun il dretg d’autur ed i n’è previs nagina redundanza pertutgant l’archivaziun.

Per visualisar ils archivs instituziunals vegn ins da princip renvià a la pagina-web da las instituziuns sezzas. Ils cuntegns da RTR per exempel èn deponids sin ses agen server, e nossaistorgia.ch renviescha damai a quel.

Tgi fixescha l’interess d’ina collecziun e decida sch’ella po vegnir preschentada sin nossaistorgia.ch?

Mintga utilisader è liber da tscherner ils cuntegns, las collecziuns ch’el vul deponer sin la plattafurma, a cundiziun ch’els stettian en connex cun l'istorgia da la Svizra rumantscha e dal Grischun.

Per las collecziuns impurtantas, surtut sch’ellas derivan d’instituziuns, vegn contactà ordavant la persuna responsabla per definir il meglier process d’integraziun.

Poss jau trametter mes documents a Vus per als laschar digitalisar?

nossaistorgia.ch è ina plattafurma digitala e cuntegna sco tala unicamain documents en furma da datoteca. Quai è er ina premissa primara per metter a disposiziun tals cuntegns (in dossier, artitgels multimedials, etc.) sin la plattafurma e per la cundivider a l’extern da nossaistorgia.ch.

nossaistorgia.ch na s’occupa damai betg da la digitalisaziun dals cuntegns ch’ella survegn; percunter stat in'equipa spezialisada a disposiziun per cussegls pratics u specifics, per inventarisar ils documents, digitalisar ed eventualmain utilisar sin la plattafurma. Per ans contactar pudais Vus trametter in e-mail a nossaistorgia@rtr.ch.

Tge formats da datoteca èn recumandads per la digitalisaziun?

Ils formats acceptads sin la plattafurma èn ils sequents:

  • foto: .jpg, .jpeg, .gif, .png. La dimensiun da las datotecas na duain betg surpassar 30 MB
  • video: avi, .mp4, .3gp, .psp, .mpg, .mpeg, .mpegts, .dv, .dvd, .svcd, .vcd, .vob, .asf, .mov, .rm, .mjpeg, .mpeg2video, .3g2, .wmv, .m4v, .mj2
  • audio: vegn acceptà mo il format mp3

Concernent la qualitad da las fotos scannadas As recumandain nus 300 dpi, uschia offris Vus als utilisaders e visitaders da la plattafurma in maletg da qualitad che permetta da distinguer tut ils detagls.

È la plattafurma protegida?

Malgrà las segirezzas informaticas che vegnan applitgadas sin la plattafurma, na pudain nus betg impedir che utilisaders chargian giu Voss documents. Tuttina, sin basa dal tip da licenza che regla l’utilisaziun dal document ordaifer la plattafurma (tut ils dretgs resalvads, royalty-free, licenza «Creative Commons»), èsi en mintga cas pussaivel da lantschar ina persecuziun penala cunter il delinquent.

Tge fa la moderaziun?

La plattafurma garantescha ina moderaziun generala dals cuntegns che ston esser confurms al reglament da nossaistorgia.ch (legiai las reglas da publicaziun).

nossaistorgia.ch resalva ils dretgs da supprimer tut ils cuntegns considerads tenor agen avis sco betg adequats u che cuntrafan a las cundiziuns generalas d’utilisaziun u al reglament preschent. Tut tenor la grevezza dal cas po nossaistorgia.ch er eliminar il conto dal utilisader en dumonda e tut ils cuntegns colliads.

Tge fa il moderatur exactamain?

Il moderatur ha l’incumbensa da survegliar che la plattafurma funcziunia bain, da defender il project editorial e da controllar che las cundiziuns generalas d’utilisaziun e las reglas per la publicaziun vegnian respectadas.
La moderaziun na verifitgescha betg l’exactadad dals documents: igl è Vossa incumbensa da garantir la vardaivladad e la valur.