Login

Inseri in num d'utilisader

Inseri in pled-clav

Jau hai emblidà mes pled-clav


Jau vi daventar commember da nossaistorgia.ch

Jau sun in'instituziun

Nus vulain scriver ensemen l’istorgia da nossa regiun

 

nossaistorgia.ch è l’emprima plattafurma digitala, istorica e participativa da la Svizra rumantscha e dal Grischun. Privats ed instituziuns mettan online lur archivs ed als dividan en dossiers tematics. La finamira è da segirar communablamain la memoria collectiva da noss chantun.

Ozendi èsi simpel da publitgar en l’internet ils agens archivs, saja quai fotografias, films, registraziuns da tun, manuscrits u autras funtaunas digitalisadas. Cun  nossaistorgia.ch survegn mintga document ina valur unica entaifer in project extraordinari: scriver ensemen l’istorgia da la Svizra rumantscha e dal Grischun.

Ils archivs da mintgin èn tant parts da vitas individualas sco er elements indispensabels d’ina istorgia collectiva. Lur effect vegn amplifitgà da las collecziuns dad instituziuns dal Grischun ch’èn preschentadas sin nossaistorgia.ch: i sa tracta da bibliotecas, mediatecas, museums e d'ina selecziun da funtaunas gia digitalisadas da Radiotelevisiun Svizra Rumantscha (RTR).

nossaistorgia.ch na s’occupa betg mo da documents vegls: era fotografias contemporanas e videos han lur plazza, e quai en ils «archivs per damaun». Gist quests cuntegns permettan da colliar l'actualitad cun l'istorgia da la Svizra rumantscha e dal Grischun e dattan a tuts la pussaivladad da daventar perditgas d'eveniments actuals ubain observaturs dal svilup da cuntradas, da l'evoluziun urbana, da modas da viver e da mentalitads.

In moviment en Svizra rumantscha ed en il Grischun

Las funtaunas publitgadas cumpiglian tut las sorts da documents istorics: archivs audiovisuals, documents stampads sco gasettas, cartas, manuscrits, dissegns, etc. La plattafurma sa drizza a tut ils abitants da la Svizra rumantscha e dal Grischun (ubain quels che han bandunà la patria) – gea a tut ils Grischuns ed a tut las Grischunas - che han en ina moda u l’autra ina colliaziun cun l’istorgia da lur regiun.  nossaistorgia.ch duai daventar ina plattafurma interdisciplinara che serva era a professiunals, a scolas ed ad universitads.

La plattafurma nossaistorgia.ch

Ils utilisaders da nossaistorgia.ch sa registreschan sin la plattafurma e deponan fotografias scannadas, films, videos, registraziuns da tun digitalisadas e testimonianzas en scrit ubain autras funtaunas istoricas. Els publitgeschan lur documents sin la plattafurma ed als partan en dossiers tematics. Quai permetta da manar ensemen funtaunas, d’approfundar temas da l’istorgia da la Svizra rumantscha e dal Grischun ed animescha da sa participar. Uschia daventan ils utilisaders editurs da lur agen conto e dals dossiers tematics ch’els han creà ed als quals els fan part. La plattafurma consista da quatter secturs: vita quotidiana, lieus, eveniments e persunas. Consultar ed utilisar la plattafurma nossaistorgia.ch è gratuit. Tuttina èsi necessari da sa registrar per pudair deponer cuntegns, commentar, cumplettar infurmaziuns, proponer in nov dossier, etc.

La plattafurma nossaistorgia.ch , sviluppada a basa d’in project da Radiotélévision Suisse (RTS) e da la Fundaziun per il mantegniment dal patrimoni audiovisual da RTS (FONSART), è averta per privats, instituziuns, associaziuns e medias. RTR envida tuts da sa participar a la plattafurma nossaistorgia.ch e da scuvrir temas, publitgar ils agens archivs e contribuir cun quai a l’elavuraziun da la memoria collectiva da la Svizra rumantscha e dal Grischun. Perquai che l’istorgia da tuts vegn scritta da las istorgias da mintgin.



Editur: Radiotelevisiun Svizra Rumantscha (RTR) - Responsabel: Erwin Ardüser - Responsabel editorial: Alexi Monn - Moderaziun: Flurina Huonder - Cussegliader tecnic: Ian Price - Design e navigaziun: Antistatique - Branding: theworkshop