Da quei chor viril d'antruras, la Ligia dil Glogn seregordan paucs pli.Dapi igl onn 1938 han dus chors virils dalla Lumnezia, la Ligia da Porclas, Lumnezia su ed la Ligia dil Glogn, Lumnezia sut (Suraua) fusiunau ed aschia fundau il Chor viril Lumnezia ni era Chor da Vallada sco el vegn era numnaus. Las arbagias dalla Ligia dil Glogn ornavan l'ustria dil Bogn da Peiden che surveva era sco liug d'exercezis . Dus portrets culs tschupials ed documents dalla fiasta districtuala a Breil 1913 ed il portret dalla fiasta da cant districtuala Surselva digl onn 1933 a Flem, haiel giu supplicau Hans Camenisch da Pitasch da fotografar quels ella grondezia orginala. Quei ei gartegiau oreifer bein! Quels ein exponi en casa da scola a Pitasch vid la preit. Pertgei ? Sin il document digl onn 1913 ein 11 da 44 cantadurs da Pitasch ed in da Riein, pia buca diltut Lumnezians. Ei setracta dil dirigent e scolast Leonhard Nold da Pitasch. Cantadurs ein scolast Risch Gaudenz da Pitasch, sesents a Luven, Andreas Caduff, Jacob Caviezel, Andreas Gaudenz, Hans Voneschen, Albert Gaudenz, Christian Caviezel ed Christian Caderas, tuts da Pitasch. Da Riein, Christian Christoffel. Ils Caviezels da Luven, oriunds e burgheis da Pitasch setenevan fetg vid lur vitg d'orgin ed tgiravan ils contacts cun esser commembers da quei chor viril. Igl ei Carl Caviezel ed Johann Caviezel. Sil document da 1933, 22 onns pli tard a Flem, anflein nus 7 nums da Pitasch, numnadamein Leonhard Nold, Jacob Cadetg, Gion Risch Caduff, Giohan Nold-Schmoll, Giohan Nold, Andreas Caduff ed Matheu Camenisch.